Blog

2024年尾，再次出發北海道，紙水仲係HKD5->JPY100，拿拿聲里數換機票出發。這次依舊早班機出發，12月3日國泰CX580 HKG09:10->CTS14:55，5個多小時的航班，自從經歷過香港至溫哥華15個小時的航班後，好象亦變得沒那麼難捱。從澳門出發的話凌晨5點就要起程，經港珠澳大橋，今次一樣選泊青衣站，再轉機場快線直達香港機場。另外今次因為要兜路去撳啲日元，要早啲起程。 機場快線半小時一班，到機場check-in後時間07:30左右，仲有大把時間，食吓煙再入Lounge坐吓，今次都係正常程序帶漏野，漏低咗個飲水袋，無計，唯有到埗後再揾吓有無得賣。 例牌起飛影片試機，今年機上明顯比2023年多人，但都係未滿員，始終雪季都係啱啱開始，再加上兩個禮拜後就係聖誕長期假，好多人都係選擇十二月中才去北海道。我又可以坐得舒服啲，非常好，因為我係公眾地方好難訓得著，隔離有個空位俾我伸展下係非常重要的。 到埗後第一時間去攞車，今次都係用Car Rental Hokkaido，一如既往的好服務。一落機我就whatsapp佢，佢都好快手覆我話安排車接我，只不過今次我又係行錯上客點，人地明明寫住去98號上落客點，但我企咗係88號到等，搞到成車人係到等我一個，最後個司機準備開車走我先趕到過去，柒咗。再提醒大家好多日本商鋪，尤其係呢類非連鎖式的商鋪都係Base on Trust，係網上填個表連訂金都唔洗俾就租到車，大家記住要守信用唔好隨便甩底，就算行程有變都同翻店家講聲。呢間租車鋪價格比用rentalcars.com抵(JPY66,000->~HKD3,000)，至於保險我就用翻rentalcover.com。租車鋪的CDW其實就係墊底費嘅保險，如果你買咗CDW而又不幸撞咗，你可以直接還車走人，如果無買嘅你就要另外再俾一筆大金額的墊底費，一般CDW都係按日數計算，而且格價會比一般墊底費低，但係就算無撞到都無得退翻俾你；而rentalcover嘅保險運作模式係：撞咗車你要先係當地交哂所有應賠的費用，翻到居住地後再向rentalcover索償。所以買唔買CDW就睇你自己點諗，反正我一直我都無買過。 攞到車馬上閃人，因為已經18:00，我本身仲怕夜晚仲係雪地上揸車危險，無幫㗎車影相拍片就起程，點知成程路一啲雪嘅痕跡都無，行軍速度大增。到札幌大通公園時19:00，今晚住APA Hotel TKP Sapporoeki-Kitaguchi Excellent，Agoda訂連稅HKD 421.57，APA呢類大型連鎖酒店都唔會差得去邊，房唔大但就應有的都有，有個露台仔。美中不足的是無哂泊車位，要泊去酒店隔離的自費車位。 落街行吓揾嘢食，酒店距離狸小路大約兩公里。我懶得再揸車出去，而且就算揸出去都未必有好位泊到車，行路算數。當日應該係+6°C，又無落雪，其實都算好行的。一路直衝狸小路，約18:30，人唔算多，可能因為係平日，而且未落雪，遊客都少人，我就沿著狸小路街頭向街尾方向兜吓揾嘢食。見到有間烤肉放題，呢類餐廳一般都唔係”毒撚-friendly”，我以前都試過N次單拖直入去呢啲餐廳攞位，但九成餐廳都係回覆：要提前訂位，明明大把枱，佢見你一個人就話無位。今次係第二種情況：放題任食只限兩個人以上先可埋位，一條友只可單點其他商品食，係日本呢類任食餐廳食物未必賺你好多，主要係吸引你入去飲酒賺酒水錢。好似我呢啲獨遊的一般都係去翻拉麵店或者迴轉壽司等有單人卡位的餐廳穩陣。 食飽飽，在附近兜多陣已經20:30，無乜嘢特別好做。行到翻酒店樓下諗住煲支煙就瞓覺，發現開始有少少飄雪，都算係好事。第二朝05:30起身開始轉大雪的跡象，原本的計劃係在札幌留到10點左右，買翻個水袋及其他日用品才揸車出發去二世古，最後都係襯唔係太多積雪快啲閃人，食個早餐07:30出發。我本身對食品並唔挑剔，係日本酒店自助早餐，我自己最食唔慣就係炒蛋，好多間都係水汪汪蒸唔似蒸炒唔似炒咁，最少中伏就係啲麵包仔。 下一集 Day2